Saray Salmo 71 - Maung A Balita Biblia

Pikakasi na Masiken

¹ Katawan, sika so salimbengan ko; ag mo ak pan balut patatalo!

² Lapud matonung ka, tulongan tan iyagel mo ak pa. Dengel mo ak tan ilaban mo ak pa!

³ Sika pa so baton-dampay a salimbengan ko, tan mabiskeg a tirinsira a mangyagel ed siak, sikay salimbeng tan manangyagel ko.

⁴ O Dios ko, iyagel mo ak pad saray totoon maoges, diad pakayari da ray maruksa tan totoon maoges.

⁵ Katawad a Dios, sikay paniilaloan ko; nanlapud impanbalolakik, sikay panmamatalkan ko.

⁶ Sikay panmamatalkan ko legay bilay ko; iyaagel mo ak manlapu lad inkianak ko. Idayew ta ka lawas.

⁷ Sakey a panoliranan ed amayamay a totoo so bilay ko, ta sikay mabiskeg a manangyagel ko.

⁸ Idadayew ta ka lawas ya inagew-agew tan ibabawag ko so kagalangan mo.

⁹ Ag mo ak pa ipopolisay, natan ta matakken ak la; ag mo ak ikakaindan, natan ta makapoy ak la.

¹⁰ Labay da ak a pateyen na saray kalaban ko; mantotongtong tan mankokomplut ira sumpad siak.

¹¹ Kuanda, “Inkaindan la na Dios! Osilan tayon erelen, ta anggapoy mangyagel ed sikato.”

¹² O Dios, ag mo ak pa aarawian; Dios ko, tulongan mo ak pa lan tampol!

¹³ Saray ondodogpad siak et natalo tan naderal ira komun. Saray malabay a mamasakit ed siak et nalemlemew tan napelag ira komun ed kababaingan.

¹⁴ Sika lawas so panilaloan ko; lalon idayew ta ka lan idayew.

¹⁵ Ibawag koy inkatonung mo; tongtongen ko lawas so panangilaban mo, anggaman ya ag ko natalusan a sigput.

¹⁶ Idayew koy pakayarim, Katawan a Dios; ibawag koy inkatonung a kayaryan mon bukor.

¹⁷ Nanlapud impanogaw ko ibabangat mo ak la, tan totongtongen ko ni ray makapakelkelaw a ginagawam.

¹⁸ Natan ta matakken ak la tan ampoti lay buek ko, ag mo ak pa ikakaindan, O Dios! Ag mo ak pa tataynan leleg kon ibabawag ed amin a kailalakan ya onsabi so biskeg mo tan say pakayarim.

¹⁹ O Dios, sabien na inkatonung mo so katawenan. Matalonggaring iray ginagawam; Siopay miparad sika?

²⁰ Initdan mo ak na saray amayamay a gunigon tan irirap, balet ipawil moy biskeg ko; ipaliis mo ak ed lobuk.

²¹ Pagmaliwen mo ak a lalon matalonggaring; ligliwaen mo ak lamet.

²² Idayew ta ka diad panogtog koy arpa; idayew koy inkatoor mo, O Dios ko. Togtogan ta kad arpak na saray imno, sikan Masanto na Israel.

²³ Oneyag ak ed liket ko, leleg ta kan totogtogan; kantaan ta kay panangidayew ed intiron inkatook, ta inlaban mo ak.

²⁴ Salitaen ko lawas ya inagew-agew so inkatonung mo, ta atalo tan naplag ed kababaingan iray nanggetman mamasakit ed siak.