Saray Salmo 68 - Maung A Balita Biblia

Kanta na Bansa Lapud Impanalo

¹ Ombabangon so Dios tan bubuyaken to ray kalaban to. Ombabatik ya atalo iray mamobosul ed sikato!

² No panoy ititikyab na asewek, ontan met so pamapagit tod sikara; no panoy katotonaw na ispirma ed abay na apoy, ontan met so ipapatey na saray totoon maoges ed arap na Dios.

³ Balet magayaga tan maliket iray matonung ed arap to; maliket ira tan oneeyag irad liket.

⁴ Kantaan yoy Dios, kantaan yo na panangidayew so ngaran to; iparaan yoy dalanen na manloglogan ed saray lorem. Yahweh so ngaran to—manliket kayod arap to!

⁵ Say Dios a manaayam ed masanton Timplo to et aasikasoen to ray olila tan iyaagel to ray bibiin balo.

⁶ Iitdan toy abung a panayaman so toon maermen, tan paliliketen to ray priso diad pangibolus tod sikara, balet nepeg a manayam ed kalawakan iray totoon mananumpa.

⁷ O Dios, nen inwanwan mo ray totoom, nen bineltang moy kalawakan,

⁸ yinmegyeg so dalin, tan angipelag na oran so tawen, lapud isabiy Dios na Sinai, say isabiy Dios na Israel.

⁹ Pinaoran moy maksil, tan pinatabam lamet so kinmelang lan dalin mo;

¹⁰ nanayam irad may katoowan mo; lapud kaabigan mo, initdan mo ray mairap-bilay na nakaukolan da.

¹¹ Angipaakseb na ganggan so Katawan, kanyan amayamay so bibiin angibawag na balita:

¹² “Ombabatik la ray arari tan saray sondalo ra!” Saray bibiin atilak ed kaabungan inaapag da ray asamsam:

¹³ saray malapatin pilak a mankidyam iray puron balituk a payak da. (Akin et nanayam iray arum ed sikayo ed kawalaan da ray koral na saray karniro nen agew na bakal?)

¹⁴ Nen say Makapanyarin-amin a Dios et binubuyak tod Palandey na Salmon iray arari, pinaoran tod man na yilo.

¹⁵ Agaylay pakapanyariy palandey na Basan, sakey a palandey ya amayamay so toktok to!

¹⁶ Balet, O palandey ya amayamay so toktok, akin et anlemlemew so pangipapasen mod palandey a piniliy Dios a panayaman to? Say Katawan manayam diman ya anggad angga!

¹⁷ Say Katawan a kaiba to ray nilibon makapanyarin karwahi to et oonlad masanton pasen manlapud Sinai.

¹⁸ Onkakalab ed saray atagey a pasen, a sankaawit to ray amayamay a priso; mangaawat na saray rigalo da ray totoon mananumpa. Manayam diman so Dios a Katawan!

¹⁹ Idayew tayoy Katawan, a manasakbat ya inagew-agew na saray kairapan tan saray gunigon tayo; sikatoy Dios a mangilalaban ed sikatayo.

²⁰ Say Dios tayo et Dios a manangilaban; sikato so Katawan, say Katawan tayo, a mangipapaliis ed sikatayod patey.

²¹ Andi-saew a betag-betagen na Dios so kaoloan da ray kalaban to, saray ag ontotondan mankasalanan.

²² Inkuay Katawan, “Ipawil kon manlapud Basan iray kalaban yo; agwaten ko rad dalem na dayat,

²³ pian makapanyakyak kayod dala ra, tan nadildilan na saray aso yo ya anggad onsawa ra.”

²⁴ O Dios, nanenengneng na amin a totoo so parada na impanalom, say libot na Dios ya arik a mamapaarap ed santuario to.

²⁵ Walad arap iray kumakanta, walad beneg iray musiko, tan walad nanleetan da iray mamarikit a mantotogtog na saray pandirita.

²⁶ “Idayew yoy Dios diad pantitipon da ray totoo to; idayew yoy Katawan, amin yon kabyangay boleg nen Jacob!”

²⁷ Walad onaan so Benjamin a sankamelagan a tribu, insan saray pangulo na Juda tan say grupo ra, tan manomtombuk iray pangulo na Zabulon tan Neftali.

²⁸ Ipanengneng mo pay pakayarim, O Dios, say pakayarin inkanam a para sikami,

²⁹ manlapud Timplom ed Jerusalem, a pangyaakaran da ray arari na saray rigalo rad sika.

³⁰ Pampasnukan mo pay Egipto, saman ya ayep ed katanobungan; pampasnukan mo ray bansa, saman a poluk na bakan kalakyan tan saray kilaw da, anggad ontuek iran mangibagat ed sika na pilak da. Buybuyak mo pa ray totoon labalabay day mibakal!

³¹ Onsabi ray imbahador a manlapud Egipto; itagey na saray taga Etiopia iray kalimaan da diad pampikasi rad Dios.

³² Kantaan yoy Dios, sikayo ran nanarian diad mundo, kantaan yo na panangidayew so Katawan,

³³ say manloglogan ed tawen, say tawen ya abaybayag lan niwala! Dengel kayod eyag ton makapanyari.

³⁴ Ibawag yoy pakayariy Dios; walad intiron Israel so kagalangan to, tan walad saray katawenan so pakayari to.

³⁵ Makapataktakot so Dios no ompapaway ed santuario to— say Dios na Israel. Iitdan toy pakayari tan biskeg iray totoo to. Idayew yoy Dios!