Saray Salmo 67 - Maung A Balita BibliaKanta na Pisasalamat 1 O Dios, kasian tan bindisionan mo kami pa; osdungan mo kami pan abageyen, 2 pian naamtaay intiron mundo so linawam; pian naamtaay amin a bansa so panangilaban mo. 3 Idayew ka komuy katoowan, O Dios; idayew ka komuy amin a katoowan! 4 Manggayaga komun iray bansa tan mankanta ra lapud liket, ta matonung so panisintinsiam ed saray katoowan tan iwawanwan mo ray amin a bansa diad tapew na dalin. 5 Idayew ka komuy katoowan, O Dios; idayew ka komuy amin a katoowan! 6 Say dalin angiter na ani; say Dios a Dios tayo binindisionan to itayo. 7 Binindisionan itayoy Dios; igalang komun na katoowan ed amin a pasen. |
Maung a Balita Biblia © Philippine Bible Society, 1983
Philippine Bible Society