Saray Salmo 66 - Maung A Balita Biblia

Sakey a Kantan Pangidayew tan Pisalamat

¹ Manliket kayon oneyag a mangidayew ed Dios, amin yon katoowan!

² Mankanta kayon mangigalang ed ngaran to; nagnap a dayew so iter yod sikato!

³ Kuanyod Dios, “Makapakelkelaw iray gagawaen mo! Diad kabaleg na pakayarim, sitatakot ya ondadakmomod sika iray kalaban mo.

⁴ Igagalang kay amin a katoowad tapew na dalin; mangakanta ran mangidayew ed sika, mangakanta ran mangidayew ed ngaran mo.”

⁵ Gali dia ta nengneng yoy ginagaway Dios, saray makapakelaw a ginagawa tod saray totoo.

⁶ Impagmaliw ton amagan dalin so dayat; binaliw dan inakar so ilog iray lalaki tayo. Nanliket itayod man, lapud ginawa to.

⁷ Manooley ya anggad angga diad panamegley na pakayari to, tan ag to aalisay mata iray bansa. Saray mananumpa et anggapo komuy onlaban ed sikato!

⁸ Idayew yoy Dios tayo, amin yon bansa; iparengel yoy panangidayew yod sikato.

⁹ Pansiasiansiaen to tayon mabilay ya anggad natan, tan ag to itayo inabuloyan a napelag.

¹⁰ Sinusubok mo kami, O Dios: no panoy kalilinisay pilak ya imparalan ed apoy, ontan met so impanusubok mod sikami.

¹¹ Inaabuloyan mo kamin napelag ed patit, tan ambelat iray impapasakbat mod sikami.

¹² Inaabuloyan mon pairapen kami na saray kalaban mi; dinmadalan kamid apoy tan delap, balet natan inyakar mo kamid pasen ya arawid kaatapan.

¹³ Mangawit ak ed abung mo na saray bagat a popoolan; isaklang kod sika ray insipan ko.

¹⁴ Iter kod sikay imbagak ya iter, nen wala ak ed gunigon.

¹⁵ Mangisaklang ak na karniron popoolan ed altar; mangibagat ak na saray bakan kalakyan tan saray kanding, et ontagey ed tawen so asewek da.

¹⁶ Gali dia tan dengel kayo, amin yon mangigagalang ed Dios, ta ibagak ed sikayoy ginawa ton para siak.

¹⁷ Tinmawag ak ed sikaton tulongan to ak; indayew kod panamegley na saray kanta.

¹⁸ No ag ko nagbabawian iray kasalanan ko, ag ak komun dinengel na Katawan.

¹⁹ Balet dinengel ak a tua na Dios; dinengel toy pikakasik.

²⁰ Idadayew koy Dios, ta ag to impolisay so pikakasik, o inekal ed siak so ag mangoman a panangaro to.