Saray Salmo 64 - Maung A Balita Biblia

Pikekerew na Panangyagel

¹ Wala ak ed gunigon, O Dios—dengel mo pay pikakasik! Natatakot ak ed saray kalaban ko—ilaban mo pay bilay ko!

² Iyagel mo ak pad saray komplut da ray totoon maoges, tan diad olupan da ray managgaway kaogsan.

³ Iyoobul dan singa ispada so kadilaan da, tan ipapatoyung dan singa pana iray anagasang a salita ra.

⁴ Masiglat dan ikakayat iray andi-baing a tila ra; dederalen da ray maung a totoo diad panamegley na benegan a panagpaoges.

⁵ Mampapabiskegan iray linawa nipaakar ed saray maoges a komplut da; pantotongtongan da no iner so pangiliraan da ray patit da. “Anggapoy makanengneng ed saraya,” kuanda.

⁶ Maoges iray plano ra, tan kuanda, “Ayadyari so impangiplano tayo ed sayan krimin.” Ag natalusan so puso tan kanunotay too!

⁷ Balet papanaen iray Dios, et bigla ran nasusugatan.

⁸ Deralen to ra, lapud saraman a salita; ompeyeng ya amin iray makanengneng ed sikara.

⁹ Ontakot iran amin; dalepdepen da ray ginagawa na Dios, tan salitaen da ray gawgawa to.

¹⁰ Manliket ya amin iray totoon matonung, lapud saray ginagaway Katawan. Diad sikatoy pakalmoan day kilalaban; igalang na amin a totoon matonung.