Saray Salmo 60 - Maung A Balita Biblia

Pikekerew na Kilalaban

¹ Inkaindan mo kami, O Dios, tan tinalo mo kami; nampasnukan mo kami—balet natan, pawil ka pa lad sikami!

² Niyegyeg moy dalin, tan pinasangim; natan tambal mo pa ray sugat to, ta nabubuyak la.

³ Impanirap mon mapalalo iray totoom; mandongilngil kamin singa abuek.

⁴ Pinasakbayan mo ray mangigagalang ed sika, pian napaliisan day deral.

⁵ Ilaban mo kami pa diad panamegley na pakayarim; ebatan mo pay pikakasi mi, pian niagel iray totoon inarom.

⁶ Manlapud santuario to inkuay Dios, “Kasumpal na panalok, apag-apagen koy Sikem, tan ibunog kod saray totook so Patar na Sucot.

⁷ Kien koy Galaad tan Manases; say Efraim so hilmit ko tan say Juda so sitrok.

⁸ Balet say Moab so panorasan kon palanggana, tan say Edom so pangibantakan koy sandalyak, a sakey a tanda a kayaryan ko. Abaloan na saray Filisteo ya oneyag ira lapud panalo rad siak?”

⁹ O Dios, siopay mangyakar ed siak diad pinadir a siudad? Siopay mangiwanwan ed siak diad Edom?

¹⁰ Peteg ya impolisay mo kami la? Ag ka la miolup ed saray sondalo mi?

¹¹ Tulongan mo kami pan mibakal ed saray kalaban mi; anggapoy kanay tulong na too.

¹² Lapud tulong na Dios, manalo kami; taloen to ray kalaban mi.