Saray Salmo 59 - Maung A Balita Biblia

Pikekerew na Kiarawid Kaatapan

¹ Iliktar mo ak pad saray kalaban ko, O Dios ko; iyagel mo ak pad saray ondodogpad siak!

² Iyagel mo ak pad saray totoon maoges; ipaliis mo ak pad saray managpatey na too!

³ Nengneng mo! Tatalaranan da ak a pateyen; mantitipon ya onlaban ed siak iray maruksan totoo. Aliwan lapud kasalanan o kaogsan a ginawak,

⁴ odino lapud kabandayan a ginawak, O Katawan, so panggaganat dan onlad saray pasen da.

⁵ Liing ka pa, Katawan a Dios a Makapanyarin-amin, ta dago mo ak a tulongan; sikan dili so onnengneng, O Dios na Israel! Bangon ka pa, ta dusam ya amin iray bansa; ag mo pa kakasian iray traidor!

⁶ Nilabi-labin ompapawil ira; singa ra ason mandangul a liber-liber ed siudad.

⁷ Dengel mo pay panagleglemew tan pangtaktakot da. Saray dila ra et singa ra ispada ed saray sangi ra, balet abaloan dan anggapoy makakadngel ed sikara.

⁸ Balet sika, Katawan, elek-elekan mo ra; balbalawen mon amin iray bansa.

⁹ Manmamatalek ak ed biskeg mo; sika so salimbengan ko, O Dios.

¹⁰ Inaro ak na Dios ko tan dagoen to ak; ipanengneng tod siak so katalo na saray kalaban ko.

¹¹ Ag mo pa ra papateyen, O Dios, ta ompan makalingwan iray totook. Buyak mo pa ra diad panamegley na pakayarim tan talom ira, Katawan a manangyagel mi.

¹² Kasalanan so walad bibil da, tan maoges ya amin iray salita ra; naerel ira komun ed inkalastug da. Lapud manaayew tan mantitila ra,

¹³ diad pasnuk mo, deral mo pa ra; deral mo ra ya anggad ag da kaoput. Naamtaan ed satan na amin a katoowan a say Dios so manooley ed Israel, tan say panooley to et sasakopen toy intiron mundo!

¹⁴ Nilabi-labin ompapawil iray kalaban ko, singa ra ason mandangul a liber-liber ed siudad;

¹⁵ singa ra ason liber-liber a manaanap na nabwag da, tan mantaglool ira no ag ira napesel.

¹⁶ Balet ikantak so nipaakar ed biskeg mo; kinabwasan ya ikantak a maksil so nipaakar ed ag mangoman a panangarom. Sikay salimbengan ko, say siroman diad panaoy gunigon ko.

¹⁷ Idayew ta ka, sikan manangyagel ko. Say Dios so salimbengan ko, say Dios a mangaarod siak.