Saray Salmo 58 - Maung A Balita Biblia

Pikekerew na Panusay Dios ed saray Totoon Maoges

¹ Sikayon manoley matonung so panagsintinsia yo? Maptek so panagsintinsia yod amin a katoowan?

² Andi! Nununoten yo labat so maoges a nagawaan yo, tan manggagawa kayoy karuksaan diad tapew na dalin.

³ Saray totoon maoges et maoges irad intiron bilay da; manlapud inkianak da, mantitila la ra.

⁴ Napno ray dita a singa saray oleg; pepepetan da ray kalayagan da a singa ra telek a kobra,

⁵ ya ag to narengel so bosis na toon managpaamo na oleg, o say kanta na masilib a salamangkiro.

⁶ O Dios, pangpang mo pa ray kangipenan da ra yan masebeg a lion.

⁷ Naandipat ira komun a singa danum ya onaagos ed arawi; nagatin-gatinan tan namagaan ira komun a singa dikarikad basbas.

⁸ Magmaliw ira komun a singa bisokul a mansumpal ed pitek; magmaliw ira komun a singa ogaw ya inatey nen nianak tan ag ton balut anengneng so liwawa.

⁹ Ag da naamamtaan so kabagut da a singa dika; diad mapalalon pasnuk na Dios isiplug to ra ed arawi legan a mabilay ni ra.

¹⁰ Manggayaga iray totoon matonung no nanengneng dan nadudusa ray makasalanan; manyakyak irad dala da ray managgaway kaogsan.

¹¹ Ikuay katoowan, “Tuan natutumangan iray matonung; tuan walay Dios a manisintinsiad sankamundoan.”