Saray Salmo 55 - Maung A Balita Biblia

Say Pikakasi na Toon Nantraidoran na Kaaro To

¹ O Dios, dengel mo pay pikakasik; ag mo pa ipopolisay so kerew ko!

² Dengel mo ak pa tan ebatan mo ak; makapkapoy ak la, lapud saray pagpagak.

³ Napapagaan ak lapud panagtaktakot da ray kalaban ko, tan lapud panagpairap da ray totoon maoges. Iitdan da ak na gunigon; ampetang so olo rad siak tan kabosul da ak.

⁴ Mapalaloy takot ko, tan say takot ed patey dedetdetan to ak.

⁵ Mapalaloy pankigtut tan panggiwgiw ko; say takot so manaarid siak.

⁶ Kuanko, “Wala komuy payak kon singa payak na malapati! Ontikyab ak ed satan tan mananap ak na napampainawaan ko!

⁷ Arawiy tikyaban ko, tan diad kalawakay panayaman ko.

⁸ Aporaen koy mananap na siruman ko, pian naliktaran koy mabiskeg a dagem tan say bagyo.”

⁹ Ag mo pa pantatalusan iray kalaban ko diad pantotongtong da, O Katawan! Nanenengneng koy inkaruksa tan gewgew

¹⁰ a liliberen day siudad ed agew tan labi, papanoen da na krimin tan gunigon.

¹¹ Walay panagderal ed inerman a pasen; napnoy panagpairap tan panagpalikdo iray daladalan.

¹² No sakey a kabosul komuy manmumurmurad siak, nitepel ko; no sakey a kalaban komuy manleleglemew ed siak, sarasarag kon iyamutan.

¹³ Balet, sika, sikan kaiba, sikan kalimug-limug ko tan malet a kaarok.

¹⁴ Masamsamit so impantongtong ta, tan naniba ta ya angigalang ed Dios diad Timplo.

¹⁵ Biglan ompatey komun iray kalaban ko; onla ra komun a mabilay ed pasen a panaayaman da ray inaatey! Say kaogsan walad kaabungan tan kapusoan da.

¹⁶ Balet onkekerew ak na tulong ed Katawan a Dios, et ilaban to ak.

¹⁷ Kabwasan, kaagwan, tan labi so panririklamo tan paney-ey kod sikato, et dengelen toy bosis ko.

¹⁸ Ipawil to ak ya ag adiwit manlapud saray pibabakal ko ed saray amayamay a kalaban.

¹⁹ Say Dios a manaari lan nanlapud gapoy gapo et dengelen to ak tan taloen to ra; ta ag da labay so mangoman tan ag da tatakotan.

²⁰ Samay gendat a kaibak dinogpaan to ray kakaaro to; ag to tinoor iray sipan to.

²¹ Marlas a singa mantikilya so panagsalita to, balet napnoy panagbosul so puso to; singa larak a panagpoyuk iray salita to, balet matdem iran singa ispada.

²² Imatalek mod Katawan iray gunigon mo, et iyagel to ka; ag ton balut aabuloyan a natalo iray totoon matonung.

²³ Balet sika, O Dios, ibantak mod lobuk, iray totoon managtila tan managpatey kasakbayay pakasumpal na kapalduay bilay da diad tapew na dalin. Siak, balet, sikay panmatalkan ko.