Saray Salmo 54 - Maung A Balita Biblia

Pikekerew na Kiagel

¹ Lapud pakayarim, O Dios, ilaban mo ak pa; lapud biskeg mo, iliktar mo ak pa!

² Dengel mo pay pikakasik, O Dios; talineng mo pa ray salitak!

³ Nitan la ray malastug a totoon ondogpad siak; labay ak a pateyen na saray maruksan totoo— totoon ag da ikabkabilangay Dios.

⁴ Balet say Dios so mananulong ko. Say Katawan so manangyagel ko.

⁵ Dusaey Dios komun iray kalaban ko diad panamegley na dilin kaogsan da! Deralen to ra, ta sikato et matoor.

⁶ Katawan, sililiket ak a mangibagat ed sika; pisalamatan ta ka lapud kamaungan mo.

⁷ Inyagel mo ak ed amin da ray gunigon ko, tan anengneng kon atalo ray kalaban ko.