Saray Salmo 53 - Maung A Balita Biblia

Say Kaogsan na Too

¹ Saray makulang-kulang a totoo kuandad sikaran dili, “Anggapoy Dios!” Maoges ira tan makapataktakot iray ginagawa ra; anggapoy anggan sakey a toon manggagaway kamaungan.

² Manlapud tawen oosdungan na Dios iray katoowan, ta labay ton nengnengen no wala ra kasi makabat o mangigagalang ed sikato.

³ Balet binmeneg iran amin, nampapara ran maoges. Anggapod sikaray manggagaway kamaungan, anggapoy anggan sakey.

⁴ Tetepeten na Dios, “Sarayan totoon managgaway kaogsan, ag da amta? Pambibilayan day tatakewen dad saray totook, tan ag ira mampipikasi ed siak.”

⁵ Balet ontan lay kataktakot da; anggapo niy asali ran onyan takot; ta ibuyak na Dios iray pokepokel na saray kalaban da ray totoo to. Impolisay ira na Dios, kanyan sigput a taloen ira na Israel.

⁶ Oy la komun ta nagamuran la na Israel so pananalo a manlalapud Sion! Ontan lay panliket na saray totood Israel no paaligwasen ira lamet na Katawan.