Saray Salmo 50 - Maung A Balita Biblia

Tuan Panangigalang

¹ Mansasalitay Katawan, say Dios a Makapanyari; tatawagen toy intiron mundo, manlapud bokig ya anggad sagur.

² Say Dios onsisindag a manlapud Sion, say siudad a nagnap sa dakep to.

³ Onsasabiy Dios tayo, balet aliwan mareen; walay manliub ya apoy ed arap to tan mabiskeg a bagyo ed kaliber-liber to.

⁴ Tatatawagen toy tawen tan say dalin a mantasi ed panintinsia tod saray totoo to.

⁵ Ibabaga to: “Tipon yod arap ko iray matoor a totook, saray akisipanan ed siak diad impangisaklang day bagat.”

⁶ Ibabawag da ray katawenan a matonung so Dios tan sikaton dili so huis!

⁷ “Dengel kayod ibagak, sikayon totook; mantasi ak sumpad sika, Israel. Siak so Dios, say Dios mo.

⁸ Ag ta kayo pamapasnukan lapud saray bagat yo tan saray bagat a popoolan a lawas yon iyaakar ed siak.

⁹ Anggaman ontan ag ko nakakaukolay bakan kalakyan a manlapud saray alog yo, o saray kanding a kalakyan a manlapud saray koral yo;

¹⁰ kayaryan kon amin iray ayayep ed katakelan tan saray baka ed nilibon kapokdulan.

¹¹ Kayaryan kon amin iray manok ya atap tan amin da ray mabilay a bengatlan walad kaalogan.

¹² “No bilang naerasan ak ag ak mialad sikayoy kanen ko, ta kien koy mundo tan amin a logan to.

¹³ Mangakan ak na karni na bakan kalakyan odino oniinom na dala na saray kanding?

¹⁴ Say pisasalamat so nepeg yon ibagat ed Dios, tan iter yod Makapanyarin-amin so antokaman ya insipan yo.

¹⁵ Tawag kayod siak no onsabiy gunigon; ilaban ta kayo, et idayew yo ak.”

¹⁶ Balet kuay Dios ed saray totoon maoges, “Antoy kanepegan yon mangidadalatdat ed saray ganggan ko? Antoy kanepegan yon manotongtong na nipaakar ed impisipanan ko?

¹⁷ Ag yo labay so pamepetek kod sikayo, ipopolisay yo ray ganggan ko.

¹⁸ No makanenengneng kayoy matakew, magmaliw kayon kakaaro to, tan kaolup-olup yo ray mikakaloguran.

¹⁹ “Sipaparaan kayon mansalitay maoges; mainomay yoy mantila.

²⁰ Sipaparaan kayon mangakusad saray dilin agagi yo tan mamakasalanan ed sikara.

²¹ Ginagawa yo ira yan amin, et anggapoy ibabagak, kanyan abaloan yon singa ak sikayo. Balet natan pamapasnukan ta kayo la, tan ipapalinew ko la yan pamaakaran ed sikayo.

²² “Dengel yo ya, sikayon ag mangasasikasod siak, ta no andi, bingbingkasen ta kayo, et anggapoy mangyagel ed sikayo.

²³ Say pisasalamat so bagat a mangigagalang ed siak, tan andi-saew ya ilaban kon amin iray mangoonur ed siak.”