Saray Salmo 48 - Maung A Balita Biblia

Say Sion a Siudad na Dios

¹ Matalonggaring so Katawan, tan manepenepeg ya idayew ed siudad na Dios tayo, diad masanton palandey to.

² Atagey tan marakep so Sion a palandey na Dios; say siudad na matalonggaring ya ari so mangiiter na gayaga ed intiron mundo.

³ Impanengneng na Dios ya anggapoy nagawan maoges ed loob na saray tirinsira na siudad lapud kiwawala tod man.

⁴ Nantitipon iray arari tan dinmago ran dinmogpa ed Palandey na Sion.

⁵ Balet kanengneng da nikelawan ira; ataktakot tan kibatiktik ira.

⁶ Asabian irad may baleg a takot tan segsegang, singa biin ngalngali la mananak,

⁷ singa saray bapor ya ipapalig-palig na maksil a bagyo.

⁸ Say nadngelan min ginaway Dios et anengneng mi la natan diad siudad na Dios mi, say Katawan a Makapanyarin-amin; asikasoen toy siudad ya anggad angga.

⁹ Diad loob na Timplom, O Dios, dadalepdepen miy ag mangoman a panangarom.

¹⁰ Idadayew kay amin a katoowan ed inerman a pasen, tan say inkabantug mo lalaknaban toy intiron mundo. Matonung so panooley mo;

¹¹ panggayagam pa ray totood Sion! Matonung so pananintinsiam, wala komuy gayaga ed saray siudad na Juda.

¹² Totoo na Dios, liber yoy Palandey na Sion tan bilang yo ray tori to;

¹³ imano yo ray padir to tan nengneng yo ray tirinsira to, pian nibaga yo ed ontombuk a kailalakan:

¹⁴ “Sayan Dios et Dios tayo ya anggad angga; iwanwan to itayo ed amin a panaon ya arapen.”