Saray Salmo 47 - Maung A Balita Biblia

Say Sankatageyan a Manoley

¹ Mantipak kayod liket, amin yon katoowan! Idayew yoy Dios diad panamegley na maksil iran kanta!

² Nepeg a takotan so Katawan a Sankatageyan; matalonggaring ya ari a manooley ed sankamundoan.

³ Impanalo to itayo ed saray totoo; impaoleyan tod sikatayo ray bansa.

⁴ Pinili toy dalin a panaayaman tayo natan, say ikikinun a kayaryan na saray totoon inaro to.

⁵ Onsesegep so Dios ed trono to. Wala ray maliket ya eyag tan tanul da ray trumpita leleg ya onsesegep so Katawan.

⁶ Kantaan yoy pangidayew so Dios; kantaan yoy pangidayew so ari tayo!

⁷ Say Dios so arid sankamundoan; kantaan yo na pangidayew.

⁸ Manyodyorung so Dios ed masanton trono to; manooley ed saray bansa.

⁹ Mantitipon iray manoley ed saray bansa a kaiba da ray totoo na Dios nen Abraham. Makapanyari so Dios nen saray amin a sondalo; sikatoy sankatageyan a manoley!