Saray Salmo 44 - Maung A Balita Biblia

Pikekerew na Panangyagel

¹ O Dios, nadngel na saray dilin layag mi— imbagad sikami na saray lalaki mi, iray makapakelaw a ginagawam nen panaon da, diad saraman ya agew;

² say impamagit mod saray pagano, tan say impangisoblay mod saray totoon manayam ed dalin da; say impanusam ed saray totoon taga arum a bansa, tan say impamaaligwas mod saray dilin totoom.

³ Saray totoom ag da sinamsam so dalin diad panamegley na saray ispada ra; ag da dinakep diad panamegley na dilin pakayari ra. Sinamsam da diad panamegley na dilin pakayarim tan biskeg mo, diad panamegley na kiwawalam ed pegley da, ya angipanengneng ya inarom ira.

⁴ Sikay arik tan Dios ko; panataloen mo ray totoom,

⁵ tan lapud pakayarim tataloen mi ray kalaban mi.

⁶ Ag ko panmamatalkan a mangilaban ed siak so panak o say ispadak,

⁷ balet inliktar mo kamid saray kalaban mi, tan tinalom iray mamobosul ed sikami.

⁸ Idayew mi ka lawas, tan angga anggan misalamat kamid sika.

⁹ Balet, natan, impolisay tan impatalo mo kami; ag mo la oolupen iray sondalo mi.

¹⁰ Inabuloyan mon imbatikan mi ray kalaban mi, kanyan inaala da ray kayaryan mi.

¹¹ Inabuloyan mon pinatas da kamin singa karniro; imbuybuyak mo kamid saray arum a bansa.

¹² Mamurmuray impangilakom ed saray dilin totoom, a singa anggapoy kablian da.

¹³ Sankanengneng na saray kakaabay mi so ginawam ed sikami, kanyan eelek-elekan tan luludlureyen da kami.

¹⁴ Ginawa mo kamin panelekan na saray arum a bansa; mameyeng-peyeng irad panlelemlemew dad sikami.

¹⁵ Lawas lay pakapapaabebak; mapalalo lay pakababaingan ko,

¹⁶ lapud pakarerengel kod panagbalaw tan panaglemlemew da ray kalaban ko tan saray mamobosul ed siak.

¹⁷ Agawa ra yan amin ed sikami anggaman ya ag mi ka alingwanan, odino dineral so impisipanan mod sikami.

¹⁸ Ag mi ka binenegan; ag mi sinumlang iray ganggan mo.

¹⁹ Anggaman ontan pinaolyan mo kamin pakaskasid pegley da ray ayayep ed katakelan; tan inkaindan mo kamid sankabilongetan a pasen.

²⁰ No tinondaan miy angigalang ed Dios mi, tan akikasi kamid sakey a dios da ray arum a bansa,

²¹ naamtaan mo la komun, ta kabat mo ray maamut a nunot mi.

²² Balet lapud sika, napapatey kami lawas, tan nipapasen kamin singa karniron papatasen.

²³ Liing ka pa, Katawan! Akin et naogip ka? Bangon ka pa. Ag mo kami pa ipopolisay ya anggad angga!

²⁴ Akin et iyaamutan mo kami? Ag mo lilingwanan so paniirap tan kagugunigon mi!

²⁵ Abakbaktar kamid dalin; mandokdokul kamid dabuk lapud inkatalo mi.

²⁶ Bangon ka pa ta tulongan mo kami! Lapud ag mangoman a panangarom, iliktar mo kami pa!