Saray Salmo 42 - Maung A Balita Biblia

KUMADWAN LIBRO (Saray Salmo 42–72 ) Say Pikakasi na Toon Nibantak ed Arum a Bansa

¹ No panoy pampipirawat na ulsa ed ambetel a danum na kolus, ontan met so pampipirawat kod sika, O Dios.

² Pampilpilalekan ta ka, say Dios a mabilay. Kapigay pakaonlak ed arap mo a mangigalang ed sika?

³ Agew-labin manakakis ak, tan saray luak labat so pambibilay ko; saray kalaban ko et pitepet da, “Iner so kawalaay Dios mo?”

⁴ Onsasakit so pusok kapag nanununotan ko ray agawa nen saman, nen kaibak iray karaklan a linmad abung na Dios, tan inwanwan ko rad panaakar da; malikeliket iran mankankanta tan maneeyag na dayew ed Dios.

⁵ Akin et onya lay paneermen ko? Akin et mapalaloy kagugunigon ko? Say Dios so panilaloan ko, tan sikato lamet so idayew ko, say manangilaban ko tan Dios ko.

^6-7 Diad bansa a nibantakan ko onsasakit so pusok, kanyan sikatoy nanununotan ko. Tinabunan to ak na saray daluyon na kaermenan; pinadalanan to ak na delap na gewgew, a singa manungol a danum a napepelag ed Jordan manlapud saray Palandey na Hermon tan Mizar.

⁸ Say Katawan ipanengneng to komun no agew so ag mangoman a panangaro to, pian makapankanta ak no labi, kantan pampikasik ed Dios na bilay ko.

⁹ Ibabagak ed Dios a manangyagel ko, “Akin et nilingwanan mo ak? Akin et siansiay paniirap ko lapud inkaruksa da ray kalaban ko?”

¹⁰ Makapkapoy ak lad panagpabaing da, ta tepet la ran tepet ed siak, “Iner so kawalaay Dios mo?”

¹¹ Akin et onya lay paneermen ko? Akin et mapalaloy kagugunigon ko? Say Dios so panilaloan ko, tan sikato lamet so idayew ko, say manangilaban ko tan Dios ko.