Saray Salmo 40 - Maung A Balita Biblia

Kantan Pangidayew

¹ Inanosan koy nanalagar ed tulong na Katawan; insan tinalineng to ak tan dinengel toy tawag ko.

² Inaon to ak ed abut na kaatapan tan diad gayungayun na patey. Inlira to ak ed tapew na baton-dampay et niarawi ak ed kaatapan.

³ Imbangat to ak a mankantay balon kanta, sakey a kantan pangidayew ed Dios tayo. Ontakot iray amayamay a makanengneng ed saya tan manmatalek irad Katawan.

⁴ Maliket iray manmamatalek ed Katawan, saray ag onsisingger ed saray talintaoy diriyos odino mibabalid saray mangigagalang ed saray tila-tilan diriyos.

⁵ Katawan a Dios mi, amayamay iray ginagawam a para sikami; anggapoy miparad sika! Amayamay iray makapakelaw a planom a para sikami. Ag kon balut nibitla ran amin— dakerakel iran tuloy!

⁶ Ag mo labay iray bagat tan saray saklang; ag mo kekerewen iray bagat a popoolan o saray bagat a para kasalanan. Initdan mo ak ingen na layag a pandengel kod sika,

⁷ kanyan inmebat ak, “Wadya ak; saray bilibilin mod siak et wala rad libro na Ganggan.

⁸ Agaylay liket kon mangoonur na linawam, O Dios ko! Yaatul kod pusok so bangat mo.”

⁹ Diad pantitipon da ray amin a totoom, O Katawan, imbagak so maung a balitan Manangilaban ka. Amtam ya ag ak balut ontondan mangibagad saya.

¹⁰ Ag ko pinokuk ed siak a dili so balitay panangilaban mo; lawas kon sasalitaey katooran tan say pananulong mo. Diad pantitipon da ray amin a totoom ag ko inyamut so ag mangoman a panangarom tan say katooran mo.

¹¹ Katawan, amtak ya ag mon balut tondaan so pangakasim ed siak! Say ag mangoman a panangarom tan say katooran mo et iyarawi da ak lawas ed kaatapan.

Pikekerew na Tulong

¹² Aliber ak na amayamay a gunigon—diad karakel da, ag ko ra nabilang! Tinabunan ak na saray kasalanan ko, kanyan ag ak la makanengneng; dakel ira nen say buek na olok, et nakal so biskeg na linawak.

¹³ Katawan, ilaban mo ak pa! Tulongan mo ak pa natan!

¹⁴ Sigput a natalo tan nagewgew komun iray manggegetman mamatey ed siak! Napasener tan napelag komun ed kababaingan iray manliliket ed kagugunigon ko.

¹⁵ Onkapoy komun so linawa ra lapud inkatalo iray manluludlurey ed siak.

¹⁶ Manliket tan manggaya komun ya amin iray ondaragod sika. Amin a misasalamat lapud panangilaban mo et ikuan da komun lawas, “Agaylay talonggaring na Katawan!”

¹⁷ Makapkapoy ak tan pakaskasi ak, O Katawan, balet nununoten mo ak. Sikay mananulong tan manangilaban ko; dago mo ak pa lan tulongan, O Dios ko!