Saray Salmo 4 - Maung A Balita Biblia

Say Pikekerew na Tulong no Labi

¹ Ebatan mo ak pa, no ontawag ak ed sika, O Dios a manangyagel ko! Tinulongan mo ak nen nagugunigon ak. Kasian mo ak pa natan tan dengel moy pikakasik!

² Kapigay itonda yon mamapabaing ed siak, sikayo ran totoo? Kapigay itonday pangaaro yod andi-kakanaan iran salita tan say panaanap yod saray tila?

³ Tandaan yo a say Katawan pinili ton kayaryan to so toon matonung, tan dedengelen to ak no ontatawag ak ed sikato.

⁴ Giwgiw kayon sitatakot tan tondaan yo lay mankasalanan; motektek yo yan maung no mandokdokul kayon mareen ed saray katri yo.

⁵ Mangisaklang kayo na saray dugan bagat tan manmatalek kayod Katawan.

⁶ Dakel iray mampikasi: “Itdan mo kami pay lalon dakel a bindision! Mapangasin osdungan mo kami pa, O Katawan!”

⁷ Balet say liket ya inter mod siak et baleg ni nen say liket da anggaman a daakan so pilak tan alak da.

⁸ No ondokul ak, mareen so pakaogip ko, ta sika labat, Katawan, so mangyaarawid siak ed kaatapan.