Saray Salmo 38 - Maung A Balita Biblia

Say Pikakasi na Toon Maniirap

¹ Katawan, ag mo ak pa dudusaen lapud pasnuk mo!

² Sinugat mo ak na saray panam, kinabil mo ak na saray limam.

³ Lapud petang na olom, agaylay paniirap ko; lapud saray kasalanan ko mansasakit so intiron laman ko.

⁴ Onlelereg ak ed karakel na kasalanan ko; nadedetdetan ak lapud ontan lay belat da.

⁵ Lapud kalokowan ko, naboboluk tan ombabanget iray girik.

⁶ Abokut ak la tan naknaksawan ak; maermen ak lawas ya inagew-agew.

⁷ Singa ak popoolan ed kapepetang ko, tan ngalngali ak la ompatey.

⁸ Makapkapoy ak tan agaylay kesaw ko; nagugunigon ak tan manay-ay ak lad sakit.

⁹ Katawan, amtam ya amin iray pampipilalekan ko; narerengel mo ray amin a panay-ay ko.

¹⁰ Mampokal so pusok tan naoput lay biskeg ko, tan ngalngali ag ak la makanengneng.

¹¹ Ag ak la singgeran na saray kakaarok tan saray kakaabay ko, lapud saray girik; aarawian ak na anggan saray kabyangay pamilyak.

¹² Saray malabay a mamatey ed siak et papatitan da ak; saray malabay a mamasakit ed siak et tataktakoten da ak a pateyen; ag ira ontotondan mankokomplut sumpad siak.

¹³ Singa ak telek ya ag makadngel, singa ak emel ya ag makasalita.

¹⁴ Singa ak toon ag makadngel, kanyan ag ak makaebat.

¹⁵ Balet manmamatalek ak ed sika, O Katawan; et sika, Katawan a Dios ko, so onebat ed siak.

¹⁶ Ag mo pa iyaabuloy ya elek-elekan na saray kalaban ko so paniirap ko; ag mo pa met iyaabuloy a manlastug ira lapud inkatalok.

¹⁷ Ngalngali ak la natumba, tan ag ontotonday panliliknak na sakit.

¹⁸ Ipapatwak iray kasalanan ko; paneermenan ko ra.

¹⁹ Saray kalaban ko et maabig so laman da tan mabiskeg ira; dakerakel iray mamobosul ed siak ya anggapoy makasengeg.

²⁰ Saray mangibabales na maoges ed maung et kalaban da ak lapud panggagawak na kamaungan.

²¹ Ag mo ak pa ikakaindan, Katawan; ag mo ak pa aarawian, O Dios ko!

²² Tulongan mo ak pa natan, O Katawan a manangilaban ko!