Saray Salmo 37 - Maung A Balita Biblia

Say Pansumpalan da ray Maung tan saray Maoges a Totoo

¹ Ag ka nagugunigon lapud saray totoon maoges; ag ka mangiimon ed saray manggagaway kaogsan.

² Ag mabayag naandipat iran singa karikaan a namamagaan; ompatey iran singa nalnes a mabunan tanaman.

³ Manmatalek kad Katawan tan manggawa kay kamaungan; manayam kad dalin tan arawi kad kaatapan.

⁴ Say Katawan so pananapan moy liket mo, et iter tod sika ray pampipilalekan na pusom.

⁵ Ipiam ed Katawan so bilay mo; manmatalek kad sikato, et sikay tulongan to;

⁶ say inkatonung mo pasinagen ton singa agew ed kaagwan.

⁷ Mandeen kad arap to, tan mananos kan manalagar ed sikato; ag ka nagugunigon lapud saray totoon onaaligwas, odino lapud saray totoon maung so pansusumpalay maoges iran getma ra.

⁸ Ag ka mapaspasnuk o mapagpaga; gunigon labat so pansumpalan to.

⁹ Nakayaryan na saray manmamatalek ed Katawan so dalin balet napagit iray totoon maoges.

¹⁰ Ag mabayag naandipat la ray totoon maoges; anggan anapen mo ra, ag mo la ra narumog.

¹¹ Balet nakayaryan na saray mapaabeba so dalin; manliket ira lapud maaligwas tan mareen so bilay da.

¹² Say toon maoges mamplaplano sumpad maung a too tan manngilet lapud pambosul to.

¹³ Eelekan na Katawan iray totoon maoges, ta amta ton maganggano lan onsabiy kadusa ra.

¹⁴ Saray totoon maoges ooyusen da ray ispada ra tan pipinaten da ray pana ra, ta pateyen da iray mairap-bilay tan saray walad pankaukolan, ta ekalan day bilay iray manggagaway kaptekan;

¹⁵ balet nadoyuk ira na saray dilin ispada ra, tan napoter-poter iray pana ra.

¹⁶ Say daiset a kayaryay toon matonung et maung ni nen say kayamanan na amin da ray totoon maoges,

¹⁷ ta say Katawan ekalan toy biskeg iray totoon maoges, balet iyagel to ray maung a totoo.

¹⁸ Say Katawan aasikasoen to ray matoluk ed sikato, tan nakayaryan dan anggad angga so dalin.

¹⁹ Ag ira manirap no makapoy so panaon; ag ira naandiay nakan no panaoy eras.

²⁰ Balet ompatey iray totoon maoges, naandipat a singa rosas a balang iray kalaban na Katawan; naandipat iran singa asewek.

²¹ Miuutang so toon maoges et ag to babayaran, balet maiter tan matulong so maung a too.

²² Ta saray binindisionay Katawan et nakayaryan day dalin, balet napagit iray insamba to.

²³ Iwawanwan na Katawan so sakey a too ed nepeg a pankurangan to, tan iyaagel to ray makapaliket ed sikato.

²⁴ No niparokul ira, ag ira mansiansian dokul, ta say Katawan ibaan to ran ombangon.

²⁵ Aliwa ak lan ogaw; masiken ak la, balet ag ko ni akanengneng na toon matonung ya inkainday Katawan, odino mipapayabol na nakan iray anak to.

²⁶ Mabolus lawas so linawa ton mangiter tan mamapabayes ed kapara ton too, tan bindision iray anak to.

²⁷ Arawian moy kaogsan tan manggawa kay kamaungan, et mansiansian mambilay ed dalin iray kabyangay boleg mo;

²⁸ ta say Katawan inaro toy kaptekan, tan ag to ikakaindan iray matoor a totoo to. Iyaagel to ra lawas, balet saray kabyangay boleg na totoon maoges et napagit ira.

²⁹ Saray matonung kayaryanen day dalin, tan panayaman da ya anggad angga.

³⁰ Say maung a too kakabatan so ibabalikas to, tan kaptekan so sasalitaen to.

³¹ Walad puso toy ganggay Dios to, tan ag ton balut sisianan.

³² Babantayan na toon maoges so maung a too tan sisiliban ton pateyen;

³³ balet ag paolyan na Katawan so maung a too a napelag ed pakayariy kalaban to, o paolyan ton nasintinsiaan a nankasalanan no naakusa.

³⁴ Manmatalek kad Katawan, tan onur mo ray ganggan to; pagalangan to ka diad pangiter tod sikay dalin, tan nanengneng mon napagit iray totoon maoges.

³⁵ Aminsan akanengneng ak na toon maoges tan maruksa; singa kiew a sidro ed Libano so panagpaatagey to;

³⁶ balet ag abayag linmabas ak, et anggapo met la; inanap ko, et ag ko la narumog.

³⁷ Imanom so toon maung, asikasom so toon matonung; say toon maarod kareenan et wala ray kabyangay boleg to,

³⁸ balet naderal ya amin iray makasalanan, tan naoput iray kabyangay boleg da.

³⁹ Say Katawan ilalaban to ray totoon matonung tan iyaagel to ra no panaoy gunigon.

⁴⁰ Tutulongan tan ililiktar to ra; iyaagel to rad totoon maoges, ta papaiyagel irad sikato.