Saray Salmo 35 - Maung A Balita Biblia

Pikekerew na Tulong

¹ Sumlang mo pa ray onsusumlang ed siak, O Katawan, tan labanan mo ray onlalaban ed siak!

² Alam pay samper tan say kawes mon para bakal, ta dago mo ak ya iyagel.

³ Iyayag mo pay pikam tan say wasay mo ed saray mangoosil ed siak. Isipan mo pan ilaban ak.

⁴ Natalo tan napelag komun ed kababaingan iray malabay a mamatey ed siak! Napapoliktar tan nagewgew komun iray mankokomplut sumpad siak!

⁵ Magmaliw ira komun a singa taep ya itiktikyab na dagem, na oosilan iray anghil na Katawan!

⁶ Ambilonget tan andanglel komuy dalan da, no kakabilen iray anghil na Katawan!

⁷ Anggan anggapoy makasengeg, pinatitan da ak tan angotkot iray aralem ya abut a pangerel dad siak.

⁸ Balet naderal iran ag da amta; naerel irad dilin patit da tan ompatey ira.

⁹ Kanyan manggayaga ak lapud Katawan; manliket ak lapud inlaban to ak.

¹⁰ Diad intiron pusok ibagak ed Katawan, “Anggapoy miparad sika, Iyaagel mo ray makapoy ed saray mabiskeg, saray mairap-bilay ed saray managpairap.”

¹¹ Saray totoon maoges mantatasi ra sumpad siak, tan iyaakusa rad siak iray kasalanan ya ag kon balut ginawa.

¹² Maoges so ibabales dad maung a ginawak, et ontan lay paneermen ko.

¹³ Balet nen mansasakit ira nanermen ak; pinairap koy siak a dili diad ag ko impangan, tan nandakmomo ak a nampikasi,

¹⁴ a singa panangipikasik ed sakey a kaaro o agi. Akatewek ak a nanaakar-akar lapud ermen, a singa ak anak a paneermenan toy ina to.

¹⁵ Balet nen maniirap ak, makaliliket ira tan niliktub da ak a ludlureyen; kinabil ak na saray totoon ag ko kabat tan ag da ak tinondaan a pinairap.

¹⁶ Panngilngiletan da ak lapud pamobosul da; singa ra totoon mambabalaw ed lopuy.

¹⁷ Katawan, kapigan ka ontondan mamambantay labat? Iyagel mo ak pad saray panagdogpa ra; iyagel mo pay bilay ko ed sarayan lion!

¹⁸ Insan pisalamatan ta kad tipon da ray totoom; idayew ta kad arap dan amin.

¹⁹ Ag mo iyaabuloy a saray kalaban ko, saraman a matitila, et elek-elekan day inkatalok; Ag mo pa met iyaabuloy a saray mamobosul ed siak ya anggapoy makasengeg et ludlureyen day impanermen ko.

²⁰ Ag ira mansasalitan singa saray kakaaro; ingen manggagawa ray nandoroman tila nipaakar ed totoon maarod kareenan.

²¹ Aakusaen da ak tan iyeeyag da, “Anengneng miy ginawam!”

²² Balet sika, Katawan, anengneng mo yan agawa. Kanyan ag ka komun marereen labat, O Katawan; ag mo ak pa aarawian!

²³ Liing ka pa, O Katawan, ta iyagel mo ak; bangun ka pa, Dios ko, ta italindeg moy katonungan ko.

²⁴ Katawan a Dios ko, matonung ka, kanyan ibawag mon anggapoy kasalanan ko; ag mo iyaabuloy pa ya elek-elekan ak na saray kalaban ko.

²⁵ Ag mo pa iyaabuloy a nibaga rad sikaran dili, “Satan imay labay min nagawa! Tinalo min siansia!”

²⁶ Saray elek-elekan day paniirap ko et sigput ira komun a natalo tan nagewgew; saray mambalegbalegan nen say siak et napaabeba ra tan napelag ira komun ed kababaingan.

²⁷ Saray mampipilalek a napaneknekan ya anggapoy kasalanan ko et oneyag ira komun ed liket tan ikuandan naynay, “Matalonggaring so Katawan! Maliket ed inyaligwas na aripen to.”

²⁸ Diad satan ibawag koy inkatonung mo, tan idayew ta ka lawas ya inagew-agew.