Saray Salmo 30 - Maung A Balita Biblia

Pisasalamat ed Katawan

¹ Idadayew ta ka, Katawan, lapud inlaban mo ak tan ag mo inyabuloy ya elek-elekan ak na saray kalaban ko.

² Kinmerew ak na tulong ed sika, O Katawan a Dios ko, et pinaabig mo ak;

³ ag mo inyabuloy ya onla ak ed lobuk. Wala ak lad dalan a mamaarap ed lobuk, balet pinapawil moy bilay ko.

⁴ Kantaan yoy panangidayew so Katawan, sikayo ran matoor a totoo to! Nunot yo no anto ray ginagawa na samay Masanto, tan pisalamatan yo!

⁵ Mangangganon onkekepay sanuk to, balet anggad samput na bilay so kaabigan to. Nayarin walay ermen no labi, balet onsoblay so gayaga no kabwasan so onsabi.

⁶ Aliknak ya arawi ak ed kaatapan, kanyan kuankod siak a dili, “Ag ak balut natalo.”

⁷ Maung kad siak, Katawan; inyagel mo ak a singa tirinsirad palandey. Balet, nen inyamutan mo ak, natatakot ak.

⁸ Tinmawag ak ed sika, Katawan; akikasi ak a tulongan mo ak:

⁹ “Anton kaabigan so niiter ed sika na ipatey ko? Anton gunggona so naalam ed kipompon ko? Nadayew ka ni na saray inaatey? Nibawag da niy inkamaung mo?

¹⁰ Dengel mo ak pa, Katawan, tan kasian mo ak! Tulongan mo ak pa, Katawan!”

¹¹ Sinalatan mo na magayagan sayaw so ermen ko; nilakseb mod siak so ermen ko, insan inkawes mod siak so gayaga.

¹² Ag ko sirin pepetay sangik; kantaan ta kay panangidayew. Katawan, sikay Dios ko; ando lan andon misalamat ak ed sika.