Saray Salmo 29 - Maung A Balita Biblia

Say Bosis na Katawan ed Bagyo

¹ Idayew yoy Katawan, sikayo ran anghil na Dios; idayew yoy kagalangan tan say pakayari to.

² Idayew yoy mapagalang a ngaray Katawan, no ompanengneng imay Masanto, dakmomo kayod arap to.

³ Narerengel so bosis na Katawan diad tapew da ray dayat; onkakarul so mapagalang a Dios, et narerengel so bosis to ed saray danum.

⁴ Narerengel so bosis na Katawan, say bosis ton makapanyari tan napnoy kagalangan.

⁵ Say bosis na Katawan popoteren to ray kiew a sidro, anggan saray sidro ed Libano.

⁶ Paluluksoen ton singa saray kilaw a baka iray kapalandeyan na Libano, tan palologtuten ton singa kilaw a bakan kalakyan so Palandey a Hermon.

⁷ Say bosis na Katawan so mamapakirmat.

⁸ Say bosis na Katawan yeyegyegen toy kalawakan; yeyegyegen to so kalawakay Cades.

⁹ Say bosis na Katawan yuyugayogen to ray kiew a robli tan papepelagen to ray bolung na kakiewan, legan ya amin a totood Timplo to et oneeyag, “Nagalang so Dios!”

¹⁰ Ooleyan na Katawan iray danudanum; manari ya anggad angga.

¹¹ Pabibiskegen na Katawan iray totoo to, tan bibindisionan to ra na kareenan.