Saray Salmo 27 - Maung A Balita Biblia

Panangiter na Dayew

¹ Say Katawan so silew tan kilalaban ko, kanyan anggapoy tatakotan ko. Say Katawan so mangyaagel ed siak ed antokaman a kaatapan; ag ak balut ontakot.

² No dogpaan ak a pateyen na saray totoon maoges, natiror tan natumba ra.

³ Anggan liktuben ak na olup na saray sondalo, ag ak ontakot; anggan dogpaan ak na saray kalaban ko, manmatalek ak nin siansia ed Dios.

⁴ Saksakey so kinerew kod Katawan; saksakey so pampipilalekan kon nagamuran: say panayam kod abung na Katawan legay bilay ko, pian nanengneng kod may kaabigan to, tan nakerew ko so panangiwanwan to.

⁵ No panaoy kairapan salimbengan to ak; iyamut to ak ed Timplo to tan itapew to ak ed baton-dampay, pian ag ak nasigensigen.

⁶ Kanyan taloen ko ray kalaban kon walad kaliber-liber ko. Mangisaklang ak na saray bagat ed Timplo to a katekep na eyag na liket. Kantaan tan idayew ko so Katawan!

⁷ Dengel mo ak pa, Katawan, no ontawag ak ed sika! Kasian mo ak tan ebatan mo ak pa!

⁸ Nen kuanmo, “Dago kayod siak,” inmebat ak, “Ondago ak ed sika, Katawan.”

⁹ Ag mo ak pa iyaamutan! Ag mo ak pa pamapasnukan; ag mo ak pa ipopolisay. Sikay mananulong ko; ag mo ak pa tataynan, ag mo ak pa ikakaindan, O Dios a manangilaban ko!

¹⁰ Nayarin ikaindan ak na amak tan inak, balet say Katawan so mangasikasod siak.

¹¹ Katawan, ibangat mo ak pad labay mon gawaen ko, tan itonton mo ak ed dalan ya anggapoy kaatapan, ta amayamay iray kalaban ko.

¹² Ag mo pa iyaabuloy a napelag ak ed lima da ray kalaban ko, a manusumlang ed siak diad panamegley na panagtila tan panagtaktakot.

¹³ Manisia ak a nanengneng ko so kaabigay Katawan diad sayan bilay.

¹⁴ Manmatalek kad Katawan. Mampabiskeg ka, pakpel moy linawam. On, manmatalek kad Katawan.