Saray Salmo 26 - Maung A Balita Biblia

Say Pikakasi na Maung a Too

¹ Katawan, ibawag mo pan anggapoy kasalanan ko, ta maung iray gagawaen ko tan sigput so panmamatalek kod sika.

² Sokayan tan subok mo ak pa, Katawan; sintinsiaan mo pa ray pilalek ko tan saray kanunotan ko.

³ Iwawanwan ak na ag mangoman a panangarom; itotonton ak lawas na katooran mo.

⁴ Ag ak mililimug ed saray totoon andi-kakanaan; ag ak mibabalid saray mansimpisimpitan.

⁵ Kabosul koy olup da ray totoon maoges, tan papaliisan ko ray managgaway kaogsan.

⁶ Katawan, oorasan ko ray limak a pangipanengneng kon anggapoy kasalanan ko, tan liliberen koy altar mo diad pangigagalang kod sika.

⁷ Maksil so pangakantak na imnon pisasalamat, tan ibabagak ya amin iray makapakelaw a gawgawam.

⁸ Katawan, inarok so abung a panaayaman mo, say pasen a kawalaay kagalangan mo.

⁹ Ag mo ak pa pidudusad saray makasalanan; ipaliis mo ak pad pansumpalan da ray managpatey na too—

¹⁰ saray totoon manggagawa lawas na kaogsan tan sipaparaan ira lawas a mangawat na pasoksok.

¹¹ Siak balet, maung so gagawaen ko; kasian tan ilaban mo ak pa!

¹² Arawi ak ed antokaman a kaatapan; idadayew koy Katawan diad olup da ray totoo to.