Saray Salmo 22 - Maung A Balita Biblia

Akis na Ermen tan Kanta na Panangidayew

¹ Dios ko, Dios ko, akin et inkaindan mo ak? Manay-ay ak a kinmerew na tulong, balet ag ni sinmabi.

² Tatawagen ta ka no agew, Dios ko, balet ag mo ak eebatan; Tatawagen ta ka no labi, balet ag ak nainawaan.

³ Balet sika so Masanto ya akayorung ed trono, say dadayewen na Israel.

⁴ Nanmatalek ed sika iray lalaki mi; nanmatalekan da ka et inlaban mo ra.

⁵ Kinmerew iray tulong ed sika et nipaliis irad kaatapan; nanmatalekan da ka, et ag ira abaingan.

⁶ Balet aliwa ak lan sakey a too; sakey ak lan alumbayar, a balbalawen tan pabpabaingan na saray totoo!

⁷ Luludlureyen ak na amin da ray makanenengneng ed siak; dilat-dilatan tan mameyeng-peyeng ira.

⁸ Kuanda, “Nanmatalek kad Katawan, Akin et ag to ka ilaban? No talagan inaro to ka, akin et ag to ka tulongan?”

⁹ Sikay angipapaway ed siak nen nianak ak; sikay nantalimad siak nen ogaw ak ni.

¹⁰ Sinmaral ak ed sika nanlapu lad inkianak ko, tan sika lawas so Dios ko.

¹¹ Ag mo ak pa aarawian! Asingger lay gunigon, et anggapoy arum ya ontulong ed siak.

¹² Amayamay iray kalaban a singa ra bakan kalakyan ya onlalakub ed siak; wala rad kaliber-liber ko a singa ra saray masebeg a bakan kalakyan a nanlapud dalin na Basan.

¹³ Onsasangi ran singa lion; mangwam iran mamibingkas ed siak.

¹⁴ Anggapo lay biskeg ko; naandin singa danum a naibung ed dalin. Akidkidwas la ray amin a pokepokel ko; atonaw a singa kandila so pusok.

¹⁵ Say kolukolung ko et amagaan a singa dabuk, tan ompepeket so dilak ed tawen-tawen ko. Tinaynan mo ak ya ompapatey ed dabuk.

¹⁶ Aliktub ak na saray totoon maoges, singa ra olup na saray ason ondodoklus ed siak; bibingkasen da ray limak tan saray salik.

¹⁷ Sankanengneng la ray pokel ko. Nengnengnengen tan molmolagatan ak na saray kalaban ko.

¹⁸ Pampapalaranan da ray kawes ko tan panaapagan da.

¹⁹ Ag mo ak pa aarawian, O Katawan! Ganatan mo pa so pangilaban ed siak.

²⁰ Ilaban mo ak pad ispada; iliktar mo pad sarayan aso so bilay ko.

²¹ Iyagel mo ak pad sarayan lion; sarasarag ak na sarayan kalakyan a bakad katakelan.

²² Ibagak ed saray kadalaan ko no anto ray ginagawam; idayew ta kad ulopan da:

²³ “Idayew yoy Katawan, sikayo ran aripen to! Itanduro yo, sikayo ran kabyangay boleg nen Jacob; igalang yo, sikayo ran totood Israel!

²⁴ Say Katawan, ag to papaolyan iray mairap-bilay, tan ag to lilingwanan so kairapan da; ag to met ira bebenegan, no ag ingen eebatan to ra no onkekerew iray tulong.”

²⁵ Idayew ta kad baleg ya olupan, lapud saray ginagawam; isaklang ko ray insipan kon bagat ed arap da ray mangigagalang ed sika.

²⁶ Saray mairap-bilay mangan iray labalabay da; saray ondaragod Katawan igalang da. Onaligwas ira komun ed ando lan ando!

²⁷ Amin da ray bansa et nanunotan day Katawan. Manlapud amin a sokung na mundo onlingaw irad sikato; igalang na amin a katoowan.

²⁸ Ari so Katawan, tan ooleyan to ray bansa.

²⁹ Ondakmomod sikato iray amin a totoon mapaatagey; ondakmomod sikato iray amin a totoon manganggay bilay da.

³⁰ Saray mantombuk a kailalakan et panlingkuran day Katawan; saray totoo ibaga rad onsoblay a kailalakan so nipaakar ed sikato.

³¹ Nibagad saray totoon iyanak ed arapen a panaon: “Inlaban na Katawan iray totoo to.”