Saray Salmo 19 - Maung A Balita Biblia

Say Kagalangay Dios ed saray Pinalsa

¹ Ipapaamta na tawen so kagalangay Dios! Ipapanengneng to ray ginagawa na Dios!

² Say balang agew ibabaga toy kagalangay Dios ed ontombuk ya agew; say balang labi ipapaamta to ed ontombuk a labi.

³ Anggapoy balikas o salitan ikakana, anggapoy tanul a narerengel;

⁴ anggaman ontan onkakayat so ipapaamta ra ed intiron mundo, tan narerengel ed amin a sokung na mundo. Say Dios nanggawad tawen na abung a panayamay agew;

⁵ ompapaway so agew, a singa nubio, ed ayaman to, singa bumabatik a sipaparaan lan milomba.

⁶ Ompapaway ed sakey a dapag na tawen ombebeltang ya onlad sananey a dapag. Ag naliktaran so petang to.

Say Ganggan na Katawan

⁷ Ayadyari so ganggan na Katawan; papasimbaloen toy biskeg na too. Napanmatalkan iray ganggan na Katawan; mangiiter ira na kakabatan ed saray anggapoy amta.

⁸ Maptek iray ganggan na Katawan, tan pagagayagaen day puso. Matonung iray ganggan to, tan liliwawaan day pakatalus.

⁹ Maung so pangigalang ed Katawan; mansiansia ed anggad angga. Matonung so pananintinsiay Katawan, tan maptek lawas.

¹⁰ Pampilpilalekan nen say sankaabigan a balituk; masamsamit nen say sankapuroan a dilo.

¹¹ Iitdan to ak ya aripen mo na kakabatan; natutumangan ak diad pangoonur ko.

¹² Anggapoy toon makanengneng na saray dilin lingo to; ipaliis mo ak pa, Katawan, ed saray niamut a kasalanan!

¹³ Iyarawi mo ak pa met ed saray ginagalan kasalanan; ag mo pa iyaabuloy ya oleyan da ak. Diad ontan magmaliw ak ya anggapoy pakatetelan, tan akaliktar ak lad kaogsay kasalanan.

¹⁴ Makapaliket komun ed sika iray salitak tan saray kanunotan ko, O Katawan a salimbengan ko tan mananondon ko!