Saray Salmo 17 - Maung A Balita Biblia

Say Pikakasi na Toon Anggapoy Kasalanan

¹ Katawan, dengel mo pay ikekerew koy katunongan; imanom pay ikekerew ko na tulong! Dengel mo pay pikakasik, ta ag ak mantitila.

² Pilaan mo ak diad pananintinsiam, ta amtam so kaptekan.

³ Sinokayan moy pusok. Dinago mo ak ed labi; sigput mo ak a sinubok, et anggapoy arumog mod siak a maoges a pilalek. Ag ak mansasalitay kaogsan

⁴ a singa pansasalitay arum; inonur koy ganggan mo, tan ag ak tinmombuk ed maruksan kagagawa.

⁵ Nankukurang ak lawas ed dalan mo, tan ag kon balut sinisianan.

⁶ Mampipikasi ak ed sika, O Dios, ta eebatan mo ak; lingaw ka pa sirin tan dengel mo ray salitak.

⁷ Ipaamtam pay ag mangoman a panangarom tan ilaban mo ak; ag ak nasigensigen na saray kalaban ko no wala ak ed diking mo.

⁸ Iyagel mo ak pan singa panangyagel mod saray matam; iyamut mo ak pad silong da ray payak mo,

⁹ pian ag ak nadogpaan na saray totoon maoges. Liliktuben ak na saray masebeg a kalaban ko;

¹⁰ anggapoy panangasi ra tan mapasirayew iran mansasalita.

¹¹ Anggan iner so pigaran ko wadman ira; tatalaranan day pankanawnawan pangitumba rad siak.

¹² Singa ra lion a mantatalaran ed siak, tan pampilalekan dan nabingbingkas ak.

¹³ Gala pa, Katawan, ta labanan mo ray kalaban ko tan talom ira! Iyagel mo ak pad saray totoon maoges diad panamegley na ispadam;

¹⁴ iyagel mo ak pad saray totoon walad sikaray amin a labay da diad sayan bilay. Dusam pa ra diad panamegley na saray kairapan ya intaryam ed sikara; nawalaan komun na dakerakel a kairapan iray anak da, tan wala ni komuy nakeraan a para saray apo ra!

¹⁵ Lapud matonung ak, nanengneng ta ka; no ombangon ak, say kiwawalam papanoen to ak na gayaga.