Saray Salmo 16 - Maung A Balita Biblia

Say Panagmatalek ed Dios

¹ Iyagel mo ak pa, O Dios, ta onsasalimbeng ak ed sika.

² Kuankod Katawan, “Sika so Katawan ko; manlalapud sika ya amin iray maung a bengatlan walad siak.”

³ Agaylay inkamaung da ray matoor a totoo na Katawan! Pakaliliketan kon maung a nakaiba ra.

⁴ Nabontunan na kairapan, iray manlilingkur ed saray diriyos. Ag ak mibiang ed saray bagat dan dala; ag ko igalang iray diriyos da.

⁵ Sika, Katawan, so amin a kayaryan ko, iiter moy amin a nakakaukolan ko; walad sanduan limam so bilay kod arapen.

⁶ Makapakelaw a tuloy iray panangarom ed siak; agaylay abig da!

⁷ Idadayew koy Katawan, ta iwawanwan to ak, tan no labi papasakbayan ak na konsinsiak.

⁸ Ag ko lawas nalingwanan so kiwawalay Katawan; walad abay ko, tan ag ak nasigensigen na antokaman.

⁹ Kanyan maliket tan magayaga ak, tan anggapon balut so pagpagak,

¹⁰ ta iyaagel mo ak ed pakayari na patey. Matoor a nanlilingkur ak ed sika, kanyan ag mo ak ikaindan ed pasen a panaayaman da ray inaatey.

¹¹ Ipaamtam ed siak so dalan a mamaarap bilay; say kiwawalam papanoen to ak na gayaga tan iitdan to ak na liket ya anggad angga.