Saray Salmo 150 - Maung A Balita Biblia

Idayew yoy Katawan !

¹ Idayew yoy Katawan! Idayew yoy Dios diad Timplo to! Idayew yoy biskeg to diad tawen!

² Idayew yo lapud saray makapanyarin ginagawa to. Idayew yo lapud sikatoy sankatalonggaringan.

³ Idayew yo diad pamaknul yod saray trumpita. Idayew yo diad panogtog yod saray arpa tan lira.

⁴ Idayew yo diad pamaknul yod saray tambul tan diad pansayaw yo. Idayew yo diad panogtog yod saray arpa tan plauta.

⁵ Idayew yo diad pamaknul yod saray piangpiang. Idayew yo diad pamaknul yod saray maknul a piangpiang.

⁶ Idayew yoy Katawan, amin yon mabilay a pinalsa! Idayew yoy Katawan!