Saray Salmo 15 - Maung A Balita Biblia

Say Linawa na Dios

¹ Katawan, siopay nayarin onloob ed Timplom? Siopay nayarin mangigalang ed sika diad Sion, say masanton palandey mo?

² Say toon oonuren toy Dios, tan kamaungan lawas so gagawaen to, tua tan napanmatalkan iray salita to,

³ tan ag to papaogesey kapara ton too. Ag manggagaway maoges ed saray kakaaro to, tan ag mangikakayat na tila nipaakar ed kapara ton too.

⁴ Babalawen to ray totoon ipopolisay na Dios, balet gagalangen to ray mangoonur ed Katawan. Susumpalen toy amin ya insipan to, anggan antoy nagawad sikato.

⁵ Mampapautang ya anggapoy abang tan ag napasoksokan a mantasi sumpad toon anggapoy kasalanan. Siopamay toon manusumpal ed sarayan amin et maligen lawas so bilay to.