Saray Salmo 149 - Maung A Balita Biblia

Imnon Pangidayew

¹ Idayew yoy Katawan! Kantaan yoy balon kanta so Katawan; idayew yo diad tipon da ray matoor a totoo to!

² Israel, manggayaga ka lapud Manamalsam; totoo na Sion, manliket kayo lapud ari yo!

³ Idayew yoy ngaran to diad panamegley na sayaw; togtog yo ray tambul tan saray arpa diad pangidayew yod sikato.

⁴ Naliliketay Katawan ed saray totoo to; papagalangan to ray mapaabeba diad pangiiter tod sikaray pananalo.

⁵ Manliket komun iray totooy Dios lapud impanalo ra tan lawas mankanta ra komun a maliket.

⁶ Paneyaeyag yo ra komun legan dan idadayew so Dios, a sankabembenan da ray matdem ya ispada,

⁷ pian natalo da ray bansa, tan nadusa da ray totoon pagano;

⁸ pian nabalor day golonggolong iray arari, tan saray pangulo ra na balatyang a golonggolong;

⁹ pian nadusa da ray bansa onung na ingganggan na Dios. Sikato yay pananalo na saray totooy Dios. Idayew yoy Katawan!