Saray Salmo 148 - Maung A Balita Biblia

Tawag ed Sankamundoan a Mangigalang ed Dios

¹ Idayew yoy Katawan! Manlapud tawen idayew yoy Katawan, idayew yo sikayon ran manaayam ed tagey.

² Idayew yo, amin yon anghil to, amin yon kabyangay mangatatawen a sondalo.

³ Idayew yo, sikayon agew tan bulan; idayew yo, sikayo ran masnag a bitewen.

⁴ Igalang yo, sikayo ran sankatageyan a katawenan, tan sikayo ran danum a walad tagey na tawen.

⁵ Igalang dan amin komuy ngaran na Katawan! Nangganggan et apalsa ra;

⁶ diad panamegley na ganggan to, andi-anggaan a nilira ra ed saray pasen da, et ag da nayarin sumlangen.

⁷ Manlapud dalin idayew yoy Katawan, sikayon dragon ed dayat tan amin yon dalem na dayat;

⁸ sikayon kirmat tan kristal, yilo tan lorem, sikayo ran mabiskeg a dagem a mangoonur ed ganggan to.

⁹ Igalang yo, sikayon kapokdulan tan kapalandeyan, sikayon kakiewan a mambubunga tan sikayon katakelan;

¹⁰ amin yon ayayep ya amo tan ayayep ed katakelan, ayayep a korung-korung tan kamanokan ed tagey!

¹¹ Igalang yo, sikayo ran arari tan amin yon katoowan, sikayo ran prinsipi tan amin yon manooley;

¹² sikayo ran babalolaki tan mamarikit, ontan yo met a mamatakken tan ogogaw.

¹³ Idayew dan amin komuy ngaran na Katawan. Matalonggaring nen anggan dinan so ngaran to; atagey nen say dalin tan tawen so kagalangan to.

¹⁴ Pinabiskeg toy bansa to, pian idayew na amin a totoo to— saray totood Israel a mabli ran tuloy ed sikato. Idayew yoy Katawan!