Saray Salmo 147 - Maung A Balita Biblia

Pangidayew ed Dios a Makapanyarin-amin

¹ Idayew yoy Katawan! Maung so mankantay pangidayew ed Dios tayo; maabig tan makapaliket so pangidayew ed sikato.

² Say Katawan ipapaalagey to lamet so Jerusalem; papapawilen to ray Israelitan nibantak ed sananey a bansa.

³ Papaabigen to ray nanaekalay biskeg na linawa tan beberberen to ray sugat da.

⁴ Inggetar toy bilang da ray bitewen tan tatawagen to rad kangaranan da.

⁵ Matalonggaring tan makapanyari so Katawan tayo; ag nasukat so kakabatan to.

⁶ Itatanduro to ray mapaabeba, balet ibabasig tod dalin iray totoon maoges.

⁷ Kantaan yo na saray imno na dayew so Katawan; togtogan yod arpa so Dios tayo.

⁸ Itatayak tod tawen iray lorem; iitdan to na oran so dalin tan pababalegan tod kapokdulan iray karikaan.

⁹ Iiter toy tagano da ray ayayep tan papakanen to ray sibong na wawak no ontawag ira.

¹⁰ Say Katawan aliwan maliket ed mabiskeg iran kabayo; aliwa met a magayagad saray masebeg a sondalo;

¹¹ balet pakaliliketan to ray mangigagalang ed sikato, saray manmamatalek ed ag mangoman a panangaro to.

¹² Idayew moy Katawan, O Jerusalem! Idayew moy Dios mo, O Sion!

¹³ Papabiskegen to ray puirtam; bibindisionan to ray totoom.

¹⁴ Pansiasiansiaen tod kareenan iray ketegan mo tan pepeneken to kay sankaabigan a trigo.

¹⁵ Say Katawan igaganggan toy mundo, et tampol a nasusumpal so ibabaga to.

¹⁶ Itatayak ton singa lanan abel so yilo tan ikakayat ton singa dapul iray kinmigtel a linaew.

¹⁷ Singa saray ankekelag a bato iray kristal ya ipepelag to; anggapoy makatepel ed betel ya ibabaki to!

¹⁸ Insan mangganggan et natonaw so yilo; pasiplugen toy dagem, et onagos so danum.

¹⁹ Ibabaga tod saray totoo to so salita to; ipapaamta tod Israel iray bilin tan ganggan to.

²⁰ Ag to ya ginawa para saray arum a bansa; ag da amta ray ganggan to. Idayew yoy Katawan.