Saray Salmo 146 - Maung A Balita Biblia

Pangidayew ed Dios a Manangilaban

¹ Idayew yoy Katawan! Idayew moy Katawan, O kamarerwak!

² Idayew ko so Katawan legan kon mambibilay; Kantaan ko so Dios ko diad intiron bilay ko.

³ Ag ka manmamatalek ed saray totoon pangulo; anggapoy toon makapangilaban ed sika.

⁴ No ompatey ira, ompawil irad dalin; naandipat met lad satan ya agew iray plano ra.

⁵ Maliket so toon tutulongan na Dios nen Jacob, tan maniilalo ed Katawan a Dios to,

⁶ say Manamalsay tawen, dalin, dayat, tan amin a logan da. Susumpalen to lawas iray sipan to;

⁷ kikilingan tod panagsintinsia to iray napapairap, tan iitdan toy nakan iray narasan. Say Katawan ibobolus to ray priso,

⁸ tan iitdan toy pakanengneng iray bulag. Itatanduro to ray atumba; aaroen to ray matonung a totoo to.

⁹ Iyaagel to ray sangkailin manaayam ed bansa tayo; tutulongan to ray balo tan saray olila, balet iyaakar to ray totoon maoges ed kaderalan da.

¹⁰ Say Katawan et ari ya anggad angga. Say Dios mo, O Sion, manoley ed amiy panaon. Idayew yoy Katawan!