Saray Salmo 145 - Maung A Balita Biblia

Kantan Pangidayew

¹ Ibawag koy inkatalonggaring mo, Dios ko tan arik; ando lan ando a misalamat ak ed sika.

² Agew-agew a misalamat ak ed sika; anggad-angga ya idayew ta ka.

³ Matalonggaring so Katawan tan manepenepeg a galangen; sigput ya ag natalusan so inkatalonggaring to.

⁴ Manlapud sakey a kailalakan ya anggad ontombuk, nadayew iray ginagawam; ibawag da ray makapanyarin kimey mo.

⁵ Salitaen da so kagalangan tan say katageyan mo, tan dalepdepen ko ray makapakelaw a gawgawam.

⁶ Salitaen na katoowan iray makapanyarin gawgawam, tan ibawag koy inkatalonggaring mo.

⁷ Ibaga ray nipaakar ed ag nasabsabaan a kamaungan mo tan ikanta ray nipaakar ed panangasim.

⁸ Say Katawan maaro tan mapangasi, aliwan maipapasnuk tan baleg so ag mangoman a panangaro to.

⁹ Sikatoy maung ed amin a too tan mapangasi ed amin a pinalsa to.

¹⁰ Katawan, idayew ka na amin a pinalsam, tan pisalamatan ka na amin a totoom.

¹¹ Salitaen day kagalangay panarian mo tan ibaga ray pakayarim,

¹² pian naamtaay amin a katoowan iray makapanyarin gawgawam tan say mapagalang a pakayari na panarian mo.

¹³ Anggad angga so panarian mo, tan ari kan anggad angga. Say Katawan matoor ed saray sipan to, tan maung ya amin iray gagawaen to.

¹⁴ Tutulongan to ray nagugunigon; itatanduro to ray atumba.

¹⁵ Amin iray mabilay a bengatla onnenengneng iran mailalod sika, tan iitdan mo ray pambilay no nakaukolan da.

¹⁶ Iitdan mo ran amin na daakan tan pepeneken mo rad pankaukolan da.

¹⁷ Say Katawan matonung ed amin a gagawaen to, tan mapangasid amin a kimey to.

¹⁸ Asingger ed amin da ray ontatawag ed sikato, saray tua so itatawag dad sikato.

¹⁹ Iiter toy nakaukolan da ray mangigagalang ed sikato; derengelan toy akis da tan ilalaban to ra.

²⁰ Iyaagel to ray amin a maarod sikato, balet deralen to ray amin a totoon maoges.

²¹ Idayew ko so Katawan; say masanton ngaran to et idayew komun na amin a pinalsa diad ando lan ando.