Saray Salmo 144 - Maung A Balita Biblia

Pisasalamat na Sakey ya Ari Lapud Impanalo To

¹ Idayew yoy Katawan a manangyagel ko! Ipapasal to ak ed pibabakal, tan ibabangat to ak ed pilalaban.

² Sikatoy manangyagel ko tan tirinsirak sikatoy salimbeng ko tan manangilaban ko, sikatoy samper a panmamatalkan ko pian niarawi ak ed kaatapan. Tataloen to ray bansan walad silong na pakaoley ko.

³ Katawan, siopa so too et iimanoen mo; say mogmon too et aasikasoen mo?

⁴ Say too et singa labat siplug na dagem; saray agew to et singa aninon ondadalan.

⁵ Katawan, ilokyas mo pay tawen tan lasur ka; diwit mo ray kapalandeyan, et onasewek ira.

⁶ Pakirmat mo pay tawen tan buybuyak mo ray kalaban mo; panam iray kalaban mo tan pabatik mo ra.

⁷ Manlapud tagey, gawat mo ak pan agwaten diad aralem a danum, tan ilaban mo ak; iyagel mo ak pad pakayari da ray totoon taga arum a bansa,

⁸ saray totoon tilay sasalitaen da, tan mantitila ra anggan sinambaan da a say katwaan so ibaga ra.

⁹ Kantaan ta kay balon kanta, O Dios; manogtog ak na arpa tan kantaan ta ka.

¹⁰ Panataloen mo ray arari, tan iyaagel moy aripen mon si David.

¹¹ Iyagel mo ak pad saray maruksan kalaban ko, ilaban mo ak pad pakayari da ray totoon taga arum a bansa, saray anggapoy tua ed antokaman a sasalitaen da tan mantitila ra anggan sinambaan da a say katwaan so ibaga ra.

¹² Singa komun saray tanaman ya ombabaleg tan ombibiskeg iray anak min babalolaki. Singa komun saray ankabaleg a lusek a mamaparakep ed sokusokung na palasio iray anak min mamarikit.

¹³ Napano komun iray kamalir mi na amin a bungay tanaman. Libo-libo komuy iyanak na saray karniro ed kaalogan mi.

¹⁴ Ondakerakel komun iray anak na baka mi, anggapo komuy naekalan ed sikara. Anggapo komuy mannangis ed saray daladalan mi lapud segsegang!

¹⁵ Maliket so bansan onyay kipapasen to; maliket iray totoon say Dios da et say Katawan!