Saray Salmo 143 - Maung A Balita Biblia

Pikekerew na Tulong

¹ Dengel mo pay pikakasik, Katawan. Lapud matonung ka dengel mo pay pikekerew ko; lapud matoor ka ebatan mo ak pa!

² Ag mo ak pa sisintinsiaan ya aripen mo; anggapoy toon matonung ed arap mo.

³ Inosilan ak na kalaban ko, tan sigput to ak a tinalo. Impokuk to ak ed ambilonget a prisowan, tan singa ak saray inaatey lan abayag.

⁴ Kanyan nanaekalan ak lay ilalo; mapalaloy paneermen ko.

⁵ Nanununotan koy linmabas iran agew; dadalepdepen ko ray amin a ginagawam, momotekteken ko ray amin a gawgawam.

⁶ Itatagey ko ray limak a mampikasid sika; singa amagan dalin a napgaan ed sika so kamarerwak.

⁷ Ebatan mo ak pa la natan, Katawan! Naandi lan amiy ilalok! Ag mo ak pa iyaamutan, ta ompan sakey ak ed saray oonlad pasen a panaayaman da ray inaatey.

⁸ Ipanunot mo pad siak kapag kabwasan so ag mangoman a panangarom, ta manmamatalek ak ed sika. Itorom pad siak so dalan a nepeg kon laen, ta mikakasi ak ed sika.

⁹ Onaasinger ak a paiyagel ed sika, Katawan; iyagel mo ak pad saray kalaban ko.

¹⁰ Sikay Dios ko; ibangat mo ak pan mangonur na linawam. Ipanengneng mo pad siak so kamaungan mo tan iwanwan mo ak pad dalan ya anggapoy kaatapan.

¹¹ Iyagel mo ak pa Katawan, onung na insipan mo; lapud inkatonung mo agwat mo ak pad saray gunigon ko!

¹² Lapud ag mangoman a panangarom ed siak, patey mo pa ray kalaban ko, tan deral mo ray amin a managpairap ed siak, ta aripen mo ak.