Saray Salmo 142 - Maung A Balita Biblia

Pikekerew na Tulong To

¹ Ontatawag ak a patulongan ed Katawan; mikakasi ak ed sikato.

² Iyaakar kod sikato ray riklamok; idadalem kod sikato ray gunigon ko.

³ Amta toy nepeg kon gawaen, no nanaekalan ak lay ilalo. Saray kalaban ko pinatitan da ak ed dalanen ko.

⁴ No onlingaw ak ed diking ko, anggapoy nanengneng kon ontulong ed siak; anggapoy mangyagel ed siak. Anggapoy mangaasikasod siak.

⁵ Katawan, onkekerew ak ed sika na tulong; sika, Katawan, so manangyagel ko; sika labat so nakaukolan kod sayan bilay.

⁶ Dengel mo pay ikekerew ko na tulong; ta linmereg ak ed kaermenan. Ilaban mo ak pad saray kalaban ko, ta mabiskeg iran tuloy nen siak.

⁷ Agwat mo ak pad segsegang ko; idayew ta kad satan diad tipon da ray totoom, lapud kaabigan mod siak.