Saray Salmo 141 - Maung A Balita Biblia

Pikakasi no Labi

¹ Ontatawag ak ed sika, Katawan; tulongan mo ak pa natan! Dengel mo ak pa no ontawag ak ed sika.

² Awat mo pan singa insinso so pikakasik, tan saray akatagey a limak a singa bagat no labi.

³ Katawan, mangyan ka pay guardiad sangik, sakey a bumabantay ed puirta na saray bibil ko.

⁴ Iyarawi mo ak pad pampilalek a manggaway maoges, o diad pikasakey ed kaogsan na saray totoon maoges. Ag ak komun mibabalid saray pista ra.

⁵ Nayarin dusaen tan pampasnukan ak na maung a too diad panangasi to, balet ag ko abuloyan a pagalangan ak na saray totoon maoges, ta ipipikasik lawas so sumpad maoges iran gawa ra.

⁶ Saray totoo birbiren dan tua ray salitak no nibantak lad kelas iray manoley da.

⁷ Singa say kiew ya abelang-belang tan asapsapsap, ontan so kitayak na saray pokel da ed sangab na pasen a panaayaman da ray inaatey.

⁸ Balet Katawan a Dios, manmamatalek ak ed sika. Papaiyagel ak ed sika; ag mo pa iyaabuloy ya ompatey ak!

⁹ Iyarawi mo ak pad saray patit ya intarya rad siak, diad saray patit da ray managgaway kaogsan.

¹⁰ Napelag komun iray totoon maoges ed saray dilin patit da, balet makapaliis ak.