Saray Salmo 137 - Maung A Balita Biblia

Tagleey da ray Israelitan Nibantak ed Arum a Bansa

¹ Diad gilig na saray ilog ed Babilonia inmiirung kami; mannangis kamin akanunot diman ed Sion.

² Insasabit mi ray arpa mi ed saray asingger a kiew a sansi.

³ Impankanta kami na saray anakep ed sikami; inkuanda a paliketen mi ra: “Manganta kayoy nipaakar ed Sion!”

⁴ Panoy panganta mi ed Katawan diad sananey a bansa?

⁵ Ag ak lan balut komun makatogtog na arpa, no nalingwanan ta ka, O Jerusalem!

⁶ Ag ak lan balut komun makakanta, no ag ta ka nanununotan, no ag ta ka nanunotan a sankabalgan a liket ko!

⁷ Nunot mo pa, Katawan, so ginagawa da ray Edomita, nen agew ya adakep so Jerusalem. Nunot mo may imbabagbaga ra, “Geba yo ya anggad pundasion to!”

⁸ Babilonia, naderal ka! Maliket so too ya ombawid sika lapud ginagawam ed sikami—

⁹ say toon mangalad saray anak mon kapangyanak, insan ibasig to rad baton-dampay.