Saray Salmo 136 - Maung A Balita Biblia

Kanta na Pisasalamat

¹ Misalamat kayod Katawan, ta sikato et maung tan andi-anggaan so panangaro to.

² Misalamat kayod sankatalonggaringan ed saray diriyos; andi-anggaan so panangaro to.

³ Misalamat kayod sankamapanyarian ed saray kakatawan; andi-anggaan so panangaro to.

⁴ Sikato labat so manggagawad saray ankakabaleg a milagro; andi-anggaan so panangaro to.

⁵ Diad kakabatan to, pinalsa to ray katawenan; andi-anggaan so panangaro to;

⁶ impasen toy dalin ed tapew na saray danum; andi-anggaan so panangaro to.

⁷ Pinalsa toy agew tan say bulan; andi-anggaan so panangaro to;

⁸ say agew a manoley no agew; andi-anggaan so panangaro to;

⁹ say bulan tan saray bitewen a manoley ira no labi; andi-anggaan so panangaro to.

¹⁰ Pinatey to ray lalakin pangulowan ya anak na saray Egipsio; andi-anggaan so panangaro to.

¹¹ Impaway tod Egipto iray totood Israel; andi-anggaan so panangaro to;

¹² diad panamegley na mabiskeg tan makapanyari ran taklay to; andi-anggaan so panangaro to.

¹³ Binelsay toy Dayat ya Ambalanga; andi-anggaan so panangaro to.

¹⁴ Pinadalan tod pegley na dayat iray totoo to; andi-anggaan so panangaro to;

¹⁵ balet impalner toy ari na Egipto tan saray sondalo to; andi-anggaan so panangaro to.

¹⁶ Inwanwan to ray totoo to diad imbeltang dad kalawakan; andi-anggaan so panangaro to.

¹⁷ Pinapatey to ray makapanyarin arari; andi-anggaan so panangaro to;

¹⁸ pinapatey to ray bantug ya arari; andi-anggaan so panangaro to;

¹⁹ si Sehon ya ari na saray Amorreo; andi-anggaan so panangaro to;

²⁰ tan si Og ya ari na Basan; andi-anggaan so panangaro to.

²¹ Inter to ray dalin da ed saray totoo to; andi-anggaan so panangaro to;

²² inter to rad Israel ya aripen to; andi-anggaan so panangaro to.

²³ Ag to itayo nilingwanan nen atalo itayo; andi-anggaan so panangaro to;

²⁴ inekal to itayod pakayari na saray kalaban tayo; andi-anggaan so panangaro to.

²⁵ Iitdan toy tagano iray amin a pinalsan mabilay; andi-anggaan so panangaro to.

²⁶ Misalamat kayod Dios na tawen; andi-anggaan so panangaro to.