Saray Salmo 135 - Maung A Balita Biblia

Kantan Pangidayew

¹ Idayew yoy Katawan! Idayew yoy ngaran to, sikayo ran aripen na Katawan,

² a manalalagey ed abung na Katawan, diad Timplo na Dios tayo.

³ Idayew yoy Katawan, ta sikato et maung; kantaan yoy dayew so ngaran to, ta sikatoy mapangasi.

⁴ Pinili ton para sikaton dili si Jacob, saray totood Israel.

⁵ Amtak a matalonggaring so Katawan tayo; matalonggaring ni nen amin da ray diriyos.

⁶ Gagawaen toy labay ton gawaen diad tawen tan diad dalin, diad saray dayat tan diad saray kaaralman.

⁷ Sikatoy mamapaatagey ed saray lorem a manlapud saray samput na dalin; gagawaen toy kirmat para saray bagyo, tan ipapaway toy dagem a manlapud kuarton panagsinupan to.

⁸ Diad Egipto, pinatey ton amin iray pangulowan, too man odino ayep.

⁹ Nanggawad man na saray milagro tan pakelaw a panusa tod ari tan amin da ray opisyal to.

¹⁰ Dinederal toy amayamay a bansa, tan pinapatey to ray makapanyarin arari;

¹¹ si Sehon ya ari na saray Amorreo, si Og ya ari na Basan, tan amin ya arari ed Canaan.

¹² Inter to ray dalin da ed saray totoo to; inter to rad Israel.

¹³ Katawan, nibawag ka lawas a Dios; nanunotan ka na amin a kailalakan.

¹⁴ Iyagel na Katawan iray totoo to; kasian to ray aripen to.

¹⁵ Pilak tan balituk iray diriyos na saray bansa; saray limay too so nanggagawad sikara.

¹⁶ Walay sangi ra, balet ag ira makasalita; walay mata ra, balet ag ira makanengneng.

¹⁷ Walay layag da, balet ag ira makadngel; ag ira anggan makaingas.

¹⁸ Saray nanggagawad sikara tan amin da ray manmamatalek ed sikara et magmaliw ira komun a singa saray talintaoy diriyos a ginagawa ra!

¹⁹ Idayew yoy Katawan, sikayon totoo na Israel; idayew yo, sikayon papari na Dios!

²⁰ Idayew yoy Katawan, sikayon Levita; idayew yo, amin yon mangigagalang ed sikato!

²¹ Idayew yoy Katawan diad Sion, diad Jerusalem a panaayaman to. Idayew yoy Katawan!