Saray Salmo 132 - Maung A Balita Biblia

Pangidayew ed Timplo

¹ Katawan, nunot mo pay David tan amin ya intepel ton kairapan.

² Nunot mo pa, Katawan, so insipan to, say sinambaan tod sika, O Makapanyarin Dios nen Jacob:

³ “Ag ak onsempet ed abung odino ondokul ed katrik;

⁴ ag ak mampainawa odino onogip,

⁵ anggad ag ko pakapangiter na pasen a para Katawan, sakey ya abung na Makapanyarin Dios nen Jacob.”

⁶ Nadngelan mid Betlehem so nipaakar ed Kaban na Sipanan, tan nalmo mi ed kaalogay Jearim.

⁷ Inkuanmi, “Onla itayod abung na Katawan; mangigalang itayod arapay trono to!”

⁸ Katawan, gala pad Timplo a kaibam so Kaban na Sipanan, say tanda na pakayarim, tan manayam ka dian anggad angga.

⁹ Gawaen lawas komun na saray paparim so inkatonung; oneyag komud liket iray totoom!

¹⁰ Nansipan kad kinen aripen mon David; ag mo pa ipopolisay so pinilim ya ari, Katawan.

¹¹ Sinambaan mod kinen David—sakey a sipan ya ag mo benegan: “Gawaen kon ari so sakey ed saray anak mon lalaki, tan onsalat ed sikan manari.

¹² No tooren na saray anak mo so impisipanan ko, tan onuren da ray ganggan ya ibangat kod sikara, onsalat met a manari ya anggad angga iray anak da.”

¹³ Pinili na Katawan so Sion; labay ton dimay panayaman to:

¹⁴ “Diay panayaman ko ya anggad angga; diay labay kon panoleyan.

¹⁵ Itdan koy Sion na daakan a nakaukolan to; peneken ko na kakanen iray mairap-bilay a totoo to.

¹⁶ Bindisionan ko ray papari to diad amin a gawaen da, tan mankanta tan oneyag iray totoo to lapud liket da.

¹⁷ Diak gawaen a matalonggaring ya ari so sakey ed saray anak nen David; diak pagnayonen so oley na pinilik ya ari.

¹⁸ Tabunan ko na kababaingan iray kalaban to, balet onaligwas so nanarian to.”