Saray Salmo 129 - Maung A Balita Biblia

Pikakasin sumpad saray Kalaban na Israel

¹ Ibagam pad sikami, Israel, so ontan lan impamairap ed sika na saray kalaban mo, nanlapu lad impanogaw mo!

² “Nanlapud lad impanogaw ko, mapalalon pinapairap ak na saray kalaban ko, balet ag da ak atalo.

³ Sinusugat da na aralem so beneg ko, tan ginawa ran singa binakan alog.

⁴ Balet say Katawan a matonung et inagwat to ak ed inkaaripen.”

⁵ Natalo tan napapoliktar komun ya amin iray mamobosul ed Sion.

⁶ Magmaliw ira komun a singa saray dikan ontutubod toktok na abung, a namagaan ira kasakbayan na ibaleg da;

⁷ anggapoy manipon ed sikara, o mamalkut a mangala ed sikara.

⁸ Anggapod saray ondadalan so mangibaga, “Bindisionan kayo komuy Katawan! Bibindisionan mi kayo diad ngaray Katawan.”