Saray Salmo 128 - Maung A Balita Biblia

Say Tumang na Panangonur ed Katawan

¹ Maliket ya amin iray matoluk ed Katawan, saray mambibilay ya onung ed saray ganggan to.

² Pambilay moy bunga na nanlingetan mo; manliket tan onaligwas ka.

³ Diad abung mo magmaliw a singa mabungan ubas so asawam, tan magmaliw iray anak mo a singa malangwer iran kiew na oliba diad kaliber-liber na lamisaan mo.

⁴ Andi-duaruwan nabindisionan na onya so toon matoluk ed Katawan.

⁵ Manlapud Sion, bindisionan ka komuy Katawan! Nanengneng mo komuy iyaligwas na Jerusalem legan mon mambilay!

⁶ Andokey komuy bilay mo, pian nanengneng mo ray apom! Manari komun ed Israel so kareenan!