Saray Salmo 127 - Maung A Balita Biblia

Pangidayew ed Kamaungan na Dios

¹ No ag ipaalagey na Katawan so abung, anggapoy kana so sagput da ray managpaalagey; no ag iyagel na Katawan so siudad, anggapoy kana so pambabantay da ray guardia.

² Anggapoy kana na pamasyay panaanap na pambilay, ya onogip na atrasado tan ombangoy masakbay. Ta iiter na Katawan so nakaukolan da ray aaroen to, legan a naogip ira.

³ Rigalo na Katawan iray anak; petepeteg iran tumang.

⁴ Saray lalakin anak na sakey a too no malangwer ni ra et singa ra pana a walad limay sondalo.

⁵ Maliket so toon walay dakel ya ontan iran pana to! Ag balut natalo, no miarap ed saray kalaban to diad pasen a panagsintinsiaan.