Saray Salmo 126 - Maung A Balita Biblia

Pikakasi a Naitday Kilalaban

¹ Nen say Katawan et impawil to kamid Jerusalem, singa labat sakey a kogip!

² Agaylay impaneelek-elek tan impankankanta mi lapud liket! Insan inkuan na saray arum a bansa, “Matalonggaring iray ginagawa na Katawan para sikara!”

³ Peteg a makapakelaw iray ginagawa na Katawan para sikami; ontan lay liket mi!

⁴ Katawan, paaligwas mo kami pa lamet, a singa pamaparanum na oran ed saray nakatan a kolus.

⁵ Iyabuloy mo pan saray nanaakis legan dan mantatanem et manani ran malikeliket!

⁶ Saray nanaakis legan dan iyaakar iray bini et ompawil iran maliket a mangankanta lapud liket da, a sankaawit da ray naani ra.