Saray Salmo 125 - Maung A Balita Biblia

Say Kiarawid Kaatapan na saray Totoo To

¹ Saray manmamatalek ed Katawan et singa ra Palandey na Sion, ya ag balut nagalaw, no ag ingen mansiansia lawas.

² No panon so inkaliber na Jerusalem na kapalandeyan, ontan met so panasayakop na Katawan ed saray totoo to, natan tan anggad angga.

³ Ag magnayon a manoley ed dalin na saray totoon matonung iray totoon maoges; ta no magnayon so panoley da, nayarin manggawa met na kaogsan iray totoon matonung.

⁴ Katawan, maung pay ipanengneng mod saray maung a totoo, diad saray mangoonur na saray ganggan mo.

⁵ Balet dusam pa met iray mangoonur na maoges a kaliktan da, no dusaen mo ray manggagaway kaogsan. Manari komun ed Israel so kareenan!