Saray Salmo 121 - Maung A Balita Biblia

Say Katawan a Manangyagel Tayo

¹ Onnenengneng ak ed kapalandeyan; iner so panlapway tulong ed siak?

² Say tulong ed siak manlapud Katawan, ya amalsay tawen tan dalin.

³ Ag to iyabuloy a natumba ka; abangon lawas so manangyagel mo!

⁴ Say manangyagel na Israel, et ag ontetemeg odino nanaogip.

⁵ Bantayan ka na Katawan; walad abay mo a mangyagel ed sika.

⁶ No agew ag ka pasakitan na petang na agew, o say sinag na bulan, no labi.

⁷ Iyagel kay Katawan ed amin a kaatapan, ag to iyabuloy a walay maoges a nagawad sika.

⁸ Iyagel to ka no onla kad laen mo tan no ompawil ka, natan tan anggad angga.